Kuehe ka’aru 22 jasyapy ramo, Kuñakarai Ladislaa Alcaraz de Silvero, Paraguái Ñe’ẽnguéra Sãmbyhyhára (PÑS) omoirũ aty guasu ojepe’ajeyhápe Aranduka koty rokẽ hérava “Arandu Ykua”, Fundación Yvy Marãe’ỹ peguáva. Ko atýpe ojejuhu avei tapicha katupyry omba’apóva arandupy ñemosarambi rehe, Tetã Arandupy Sãmbyhyha pegua ha heta puraheihára ha ñe’ẽpapára.
En la Biblioteca 640x427

Aranduka koty ojejuhu Fundación Yvy Marãe’ỹ rógape, Coronel Romero 318 ha Coronel Bogado tape ári, táva San Lorezo-pe. Hyepýpe ojejuhu 3.500 aranduka rupi, avei revista ha folleto-eta, hemeroteca ha videoteca. Ojepe’ajey hokẽ kuehe, Tetã Arandupy Sãmbyhyha ñepytyvõ rupive ha ikatúta ojeho ojejetypeka hyepýpe arakõi guive arapokõi meve. Upépe oĩ opáichagua aranduka oñe’ẽva guarani ha iñarandupy rehe, ymaite guive guaréma arandukakuéra ojejuhu hyepýpe; siglo XVII guive, upe Tesoro de la Lengua Guarani, jesuita Ruiz de Montoya ohai va’ekue, térã avei Civilización Guaraní, Moisés Bertoni haipyre, ha upéicha hetaiterei aranduka neporãmbajepéva.

Kuñarai guasu Ladislaa Alcaraz omomba’eguasu ko aranduka koty rokẽ jepe’a ha he’i: “Tuichaite mba’e jareko ramo peteĩ aranduka renda jaha haguã ñañapymi voi ipype; arandu raitýpe, arandukakuérape, ikuatia rehe oje’óva ohóvo ñe’ẽ porãita guaraníme térã guarani rehe oñe’ẽva, ñañembokatupyryve haguã jahávo”, omombe’u PÑS Sãmbyhyhára.

Aty guasúpe ojejuhu mesápe Kuñakarai Ladislaa Alcaraz de Silvero, PÑS Sãmbyhyhára; Karai Miguel Ángel Verón, Ateneo de la Lengua y Cultura Guaraní San Lorenzo pegua Moakãhára; Kuñakarai Adriana Farías, Dirección General de la Creación y Diversidad Cultural Moakãharapavẽ, Tetã Arandupy Sãmbyhyha pegua; ha karai Rubén Segovia, Director de Cultura táva Capiatá pegua.

Deja una respuesta

Tu dirección de correo electrónico no será publicada. Los campos obligatorios están marcados con *