26, 27 ha 28 ko jasypoapýpe, Guarani Ñe’ẽ Arapokõindýpe, Fundación Yvy Marãe’ỹ ojapóta “Ñe’ẽasakuaa, Ñe’ẽndykuaa ha Ñe’ẽ Ojehekovejopýva  rehegua Amandaje. Jaguerojera ñane Ñe’ẽ Guarani”, táva San Lorenzo-pe, oĩtahápe heta tapicha arandu Paraguái ha tetã ambueygua.

 

Ko atyvusu niko ojejapóta Arandu Pyahu rekávo hérava “Oñembyatýta ñe’ẽndy guaranimegua oĩmavavoi, ha ojeguerojeráta ñe’ẽpyahu informática ha internet rehegua” ryepýpe, omboguatáva Fundación Yvy Marãe’ỹ Consejo Nacional de Ciencia y Tecnología-CONACYT jeykekópe. Hyepýpe oñemoñe’ẽta tapichakuéra arandu omoñe’ẽasakuaáva, avei umi oñemoarandúva ñe’ẽndykuaa ha ñe’ẽpykuaápe, taha’e tetãyguáva ha pytaguáva. Ko tembiapo niko maymavete tapichápe g̃uarã, ág̃a katu oñembosako’i mbo’ehára ha temimbo’ekuéra ñe’ẽ ha informática-pegua iñasãiva opaichagua mbo’ehaovusuháre ko ñane retãpýpe reraitépe.

 

Ha’e rupive oñemoheñoise peteĩ pa’ũ ojojuhuhápe tapichakuéra iñarandúva ñe’ẽasakuaa ha ñe’ẽndykuaápe, ko’ýte ñañe’ẽramo guarani rehe, arandu pyahu jeheka ñe’ẽndykuaa rehegua ryepýpe, ogueroguatáva Fundación, ikatu hag̃uáicha oñemopyenda ha ojeporu opaite henda rupi ha opaite mba’erã ko tetã ñe’ẽtee. Upépe Yvy Marãe’ỹ oikuaaukáta moõ mevépama omboguatahína tembiapo guasu “Oñembyatýta ñe’ẽndy guaranimegua oĩmavavoi, ha ojeguerojeráta ñe’ẽpyahu informática ha internet rehegua”

 

Ko Amandajépe oñe’ẽta karai ñe’ẽmbohasahára uruguaigua Fabio Descalzi Sgarbi; ha’éniko  arquitecto ha ombohasa aranduka ha ambue kuatia arquitectura ha turismo rehegua alemán ha inglés-gui castellano-pe. Ñane retãmegua, ohechaukáta tembiapokue terminología ha ñe’ẽasa rehegua  Tekombo’e ha Arandupy Motenondeha, Paraguái Ñe’ẽnguéra Sãmbyhyha, Guarani Ñe’ẽ Rerekuapavẽ, Universidad Nacional de Asunción, Universidad Católica Nuestra Señora de la Asunción, Ateneo de Lengua y Cultura Guaraní, ha Fundación Yvy Marãe’ỹ.

 

Fundación Yvy Marãe’ỹ niko hína tetãygua aty oñemoheñoiva’ekue 23 jasyrundy 2005-pe, ha hekovéva leikuéra renondépe Decreto Py 9184/07 rupive. Opa hendáicha oñeha’ã oipytyvõmirekávo ko Paraguáipe ipyrendaporã ha imbareteve hag̃ua opaite teko ha ñe’ẽ, opavavéva tojokupyty; upéichante avei ko tetãme oñemomba’e hag̃ua derecho teko ha ñe’ẽnguéra rehegua, tojeporujoja guarani ha castellano Estado ha tetãygua apytépe, toñemombarete ha toñemomba’e indígena-kuéra ñe’ẽ ha toñemboaje opaite tapichápe iderécho, oikovévo iñe’ẽme.

 

Ko Seminario oikóta Yvy Marãe’ỹ rógape, opytáva Coronel Romero 318 ha Coronel Bogado, táva San Lorenzo-pe. Tapicha oikuasevéva hesegua térã ouséva ikatu oike ojeporeka marandu rehe Yvy Marãe’ỹ web-pe: www.yvymaraey.org, térã ohenói ko pumbyrýpe: 021 3388241.

Deja una respuesta

Tu dirección de correo electrónico no será publicada. Los campos obligatorios están marcados con *