Ko árape, 23 jasyrundy 2020, Yvy Marãe’ỹ omboty 15 ary temimoĩmby háicha.  Fundación Yvy Marãe’ỹ niko hína tetãygua aty oñemoheñoiva’ekue 23 jasyrundy 2005-pe, ha hekovéva leikuéra renondépe Decreto Py 9184/07 rupive. Opa hendáicha oñeha’ã oipytyvõmirekávo ko Paraguáipe ipyrendaporã ha imbareteve hag̃ua opaite teko ha ñe’ẽ, tove opavave tojokupyty; upéichante avei ko tetãme oñemomba’évo derecho teko ha ñe’ẽ rehegua, tojeporujoja guarani ha castellano Estado ha tetãygua apytépe, toñemombarete ha toñemomba’e avaitevakuéra ñe’ẽ ha toñemboaje opaite tapichápe iderécho, oikovévo iñe’ẽme.

Ojapo 15 ary, pa tapicha romoneĩ romboaje ko temimoĩmby ha romoneĩ hekoguataha. Ko’ã arýpe, Yvy Marãe’ỹ guive romboguata heta tembiapo, jahechápa upéichape ohyvykói, oñemombarete ha oñemopyenda ñe’ẽheta, ha Estado guive toñemboguata política añetete omombareteva’erã ñe’ẽnguéra, taha’e Paraguái, América y yvy tuichakue javeve. Heta roseminario’apo, roamandaje, roporohekombo’e, roñomongeta’apo ha roporoipytyvõ ikatuháicha oñemboguata haḡua ñe’ẽ ha teko tapichakuéra apytýpe. Ko Paraguáipe, heta romba’apo ambue temimoĩmbýpe g̃uarã, umíva apytépe: Tekombo’e ha Tembikuaa Motenondeha, Tetã Arandupy Sãmbyhyha, Tetã Rembijokuái Sãmbyhyha, Tetã Parlamento, Coordinadora de Derechos Humanos del Paraguay (CODEHUPY), Red Contra Toda Forma de Discriminación ha hetaitereive atýpe g̃uarã.

Romba’apo avei aty tetã’ambueyguápe, umíva apytépe: UNESCO, MERCOSUR Cultural, UNICEF, Amnistía Internacional ha ambueve. Fundación oĩva’ekue Taller de la Sociedad Civil-pe, rojoaju haguépe hetaiterei tetãygua aty, ha hatã omba’apova’ekue osẽ hag̃ua Léi Ñe’ẽnguéra Rehegua 2010-pe.

2012-pe romoheñói Instituto Técnico Superior de Estudios Culturales y Lingüísticos Yvy Marãe’ỹ, kóva niko oñemoañeteva’ekue MEC Resolución Py1261/12 rupive. Ko mbo’ehao omboguata ko’ã mbo’esyry: Tecnicatura Superior en Traducción e Interpretación Castellano-Guaraní, Tecnicatura Superior en Antropología y Gestión Cultural, Diplomatura en Lengua y Literatura Castellana, Diplomatura en Lengua y Cultura Guaraní, Curso Taller en Lengua de Señas Paraguaya, Curso Taller en Elaboración de Proyectos Educativos, Curso Taller de Lengua Guaraní, Curso Taller de Lengua Castellana.

2015 guive Yvy Marãe’ỹ oñepyrũ investigación lingüística. Umi tembiapo romboguata Consejo Nacional de Ciencia y Tecnología (CONACYT) pytyvõme. Tembiapo kakuaavéva ojapóvo ñavõ arýpe hína Ñe’ẽasa, Ñe’ẽtekuaaty ha Ñe’ẽ ojehekovejopýva rehegua Amandaje, oĩhápe tetãygua ha pytaygua. Irundyha rojapókuri ako 3, 4 ha 5 jasypa 2019-pe, oko’i haguépe 400 tapicha, ha ou haguépy ohykuavo arandu 20 tapicha katupyry, 9 ambue tetãygua ha11 katu paraguaigua. Upe amandajégui ko jasýpe roguenohẽ mokõi aranduka, peteĩ castellano-pe ha ambue guaraníme, oñemyasãi haguépe artículo omoḡuahẽva’ekue umi tapicha ouva’ekue oñe’ẽ.

Yvy Marãe’ỹ guive rokombida mayma tetãyguápe jarojerávo tetã hekoheta ha iñe’ẽhetáva, tove opavave tojokupyty, ha ñande tetãygua tañandejapaite ipype. Upéichante avei rojorure tetã ruvichakuérape tomoañete mi tembiapoukapy omoañetéva mayma tetãyguápe derecho oikovéve heko ha iñe’ẽme, ko’ýte ojapóvo omandáva Léi 4251/10 Ñe’ẽnguéra rehega. Mbyte rasa umi 6000 ñe’ẽ ojeporúva ko yvy ape ári niko oike tesaparápe; ndaikatuvéima jajeha omanove ñe’ẽ Paraguái, América ha avei ko yvy ape ári. Tekoveheta, tekoheta ha ñe’ẽheta niko tekotevẽterei yvyporakuéra ha opa tetã jaikove haḡua oñondivekuéra jokupytýpe.

Yvy Marãe’ỹ róga opyta Cnel. Romero 318 ha Cnel. Bogado, San Lorenzo táva, Paraguái-pe. Pumbyry: (021) 580548 ha (021) 3388241. Ñe’ẽveve: yvymaraey@yvymaraey.org.

San Lorenzo, 23 jasyrundy 2020

Deja una respuesta

Tu dirección de correo electrónico no será publicada. Los campos obligatorios están marcados con *